Gamla myndin

Komið úr róðri við Þrándarós í Suðursveit

Komið úr róðri við Þrándarós í Suðursveit

Í Suðursveit var róið til fiskjar áður fyrr og allt fram undir árið 1960. Steinþór Þórðarson á Hala segir í bók sinni „Nú-nú“ að matbjörg íbúa Suðursveitar hafi lengi vel verið sjórinn. Róið var frá hafnlausri strönd og helsti útróðrarstaður var fyrir miðju sveitar, við Þrándarholt í Bjarnarhraunssandi. Einstöku sinnum við bestu aðstæður var þó róið um svokallaðan Þrándarós eða Þránd, sem er ós Staðarár, en hún rennur stundum til sjávar við Þrándarholtið, en í annan tíma austur í Hestgerðislón. Það var þó undantekning og aðeins var hægt að fara um Þránd á háflóði eða þá á liggjandanum þar sem sker eru utan við. Oftast var skipunum því bara rennt beint upp í fjöruna og afl úthafsöldunnar nýtt til að bera þau sem lengst upp á land.

Þessi mynd er tekin þegar Borghefningar og Miðþorpsmenn voru að koma úr róðri á sjötta áratug síðustu aldar. Sjóveður var með eindæmum gott svo að hægt var að róa um Þránd og eru þeir komnir í land aftur með drekkhlaðinn bátinn. Þrándarholtin sjást í baksýn. Róið var á Vagninum, sexæringi sem Skarphéðinn Gíslason á Vagnsstöðum smíðaði laust eftir 1940.

Á myndinni er hægt að þekkja Steinþór Benediktsson á Kálfafelli sem tók á móti þeim í fjörunni, Guðmund Jónsson í Suðurhúsum, Ingimar Bjarnason á Jaðri, Gunnar Stefánsson í Borgarhöfn, Jóhann Björnsson á Brunnum og Þorstein Jónasson í Lækjarhúsum. Þórarinn Gunnarsson á Vagnsstöðum segist hafa verið með í för og líklega hefur Benedikt Þórðarson á Kálfafelli einnig róið til fiskjar þennan dag svo að það eru þá þeir sem eru svo önnum kafnir við að koma aflanum á land.

 

Mynd: Vigfús Sigurgeirsson ljósmyndari
Texti: Þorbjörg Arnórsdóttir

 

Nýjasta blaðið

Glettingur 68. tölublað
Nr. 68 - 1. tbl 2017

Nýjasta tölublað

68. tölublað
Fjöldi áhugaverðra greina um málefni Austurlands.

Efnisyfirlit
Ljóðin
Ljósmyndarinn
Völundarvinjar og lúpína á Austurhálendinu
Villa á Skriðdalsöræfum
Ritstjórinn
Gamla myndin

Panta eintak

• Þrjú tölublöð á ári.
• Áskriftarverð kr. 4.500.
• Verð í lausasölu kr. 1.800.
• Nýir áskrifendur fá eldri hefti á afsláttarverði.

Panta áskrift / eintak

Forsíðan

Borði

Áskrift

Viltu gerast áskrifandi?
• Þrjú 52 síðna tölublöð á ári.
• Áskriftarverð kr. 4.500-
Pantaðu í síma 848 3314 eða smella hér >